некоммерческий независимый интернет-проект
УДМУРТОЛОГИЯ
удмуртский научно-культурный информационный портал
главная страница
новости портала
поиск

наши проекты

Изучение
удмуртского языка


Удмуртские шрифты и раскладки

Первый
удмуртский
форум


Каталог
удмуртских
сайтов


Удмуртский национальный интернет

Научная
библиотека


Геральдика
Удмуртии


Сайт Дениса
Сахарных


обратная связь
благодарности

дружественные
проекты

Википедия
удмурт кылын


Научный журнал
«ИДНАКАР»


Магазин
«Сделано в Удмуртии»


Ethnic Radio

РуссоВекс

Книги Удмуртии –
почтой


Удмурт блог
Романа Романова


UdmOrt.ru

Ошмесдинь
удмуртские тексты

Сергей Матвеев

МАМАЛЭН ВЕРАМЕЗ

Издано: Матвеев С.В. Шузи. Роман, повесть, веросъёс. Ижевск, Удмуртия, 1995. С.118-125.

...Дедушкае мынам узыр Савин вылэм, узыр Савинлэн пиез — Иван. Иванэз но, узыр Савинэз но мон ӧй адӟы ни. Курадӟыса будӥ. Айыме тани кык пол армие басьтылӥзы: нырысь действительное басьтӥзы, собере — войнае. Мон сое уг тодӥськы ни. Огнам будӥ. Сузэре но, братэ но ӧвӧл. Эшлэсь вожъяськыса — трос пияй. Мар-о эшшо вералод на? Туж трос веран но — уг быгаты мон вераны. Мынам бӧрдэм потэ, вераны кутскисько ке... Сыӵе курадӟыса будӥ... Уз лу мынам вераме...

Одӥг пинал умой будэ, шуо, но чик одӥг пинал но кыӵе ке курадӟыса будӥз. Мамае уен-нуналэн ужа вал, семьяез ӧвӧл но. Семья ӧвӧлтэмен, ачим но вазь ужаны кутски. Куинь-ньыль классысен ик. Уг быгаты вераны, котьмар тон шу но...

Бабаед, монэ сюдыны турттыса, отӥ-татӥ медъяськыса ветлӥз. Кызьы чиданы луоз? Мыным нянь ваё шуыса ужаны кошкем но, тятя монэ корка огнаме пуктыса кельтэм, шуиз бабаед. Оло действительное басьтыкузы, оло войнае кошкыкуз озьы... Сюреке, пе, ужаны кошки но, тӥни, сое армие басьтӥллям. Бертӥсько но, веразы, пе, нылыд огназ кельтэмын шуыса. Мон, пе, пукисько, корка шоры пуксьыса, пичи маке. Нош тятя войнае кошкыку, мон куать арес кыли, шуиз. Кызьы-о, со сяна, уг тодӥськы ни мон. Гожтэт гожъяны мама косэ ке, “тятя” гожтыны но уг тодӥськы вал. “Мама” гожтыны тодӥсько, “тятя” — уг. Гуртэ мыныса, гожтыса ваисько вал.

Всё, эшшо мар-о? Озьы ик курадӟыса будӥ.

Бабаед ужась вал но, бабаедъя-а, мар-а ачим но ужась луи. Фермаын ужа вал. Фермаын тырмытэк, сушилкаын ужа на вал. Дорын ужа, муртлы юрттылӥз.

Веркадэ вераса-вераса гожъято но — лэзё ай. Коркан пукон сямен. Уг быгаты отчыяд вераны. Озьы, вераськон сяменым гожъясалыд ке... нош мугес косӥськод ке — уг луы мынам вераме.

Бӧрдӥсько но — тани уката йыры висе.

Эшъёсы чиста сузэр-братэн вал но — шудо вал, нош мон огнам... Бабаед ужаны кошке, лумбыт пытсаса возе вал монэ. Одӥг пол ужаны кошкиз — ыжпимы вордскиз, чыльк-чольк тэтчаса ветлэ вал но, сураськыса кельтэм- мар вышкые тэтчиз — ыжпие кулӥз, ачим но сутскисько вал ини. Поттыны турттӥ-турттӥ — ӧй быгаты. Ой, мае гинэ веранэз ӧвӧл но — уг луы вераме. Ноку но улытозям умой улонэз ӧй адӟы.

Веркаез гожъято ай но — лэзё. Каллен гинэ вераса гожъято.

...Базаре мыныны кулэ вал. Али Веркаен Ларисэн базаре ветлӥзы но, уксёе ӧвӧл шуыса, дэрем басьтымтэ. Синмаськем дэремзэ басьтымтэ. Верка, пе, косӥсько вал басьтыны... Со басьтэм. Тынад уксёед ӧвӧл, дыр, о-о, пие, вань-а?.. Вить сюрсэз векчиятэмед уз луы, дыр, луоз-а?.. Пенсия мыным али сётӥзы но, одӥг сюрсэ вал но, сое берыктӥ. Куать сюрсэ вань мынам но... Кыӵе ке гоно дэремзы, пе, вал, сыче — “уко” шуо вал азьвыл, чилясен мар ке. Нош таиз басьтымтэ. Мыным ӧз кельшы, мукетыз кельшиз, шуиз. Собере басьтэ вал соос. Кыкназы но огазе уло. Люкиськизы ке но, огзылэсь огзы дӥсяса нуллэмзы луысал, пӧртэм басьтысалзы ке. Табере ӧвӧл ни, дыр. Ма, оло, мызонэз кельшоз?..

Собере со мамазы огназ улэ-а доразы?.. Мынэсьтым пересь-а со?.. Одӥг быдза?.. Ма, секыт, дыр, ук озьы улыны? Дышемын шат?.. Ма, кызьы-о пудотэк нош? Уг ужа ни дыръя, пудотэк мӧзмыт луоз ук. Со кемалась пенсие потэмын овол, дыр ай, пиналъёсыз кык гинэ бере?.. Витьтон вите потэмын-а? Собере, со дышетӥсьын ужамын, мынэсьтым пинал, дыр ай, пие. Ужам муртэд, учкай-ко, Нюра кык ар мынэсьтым бадӟым но, со воксё пинал адске ук ай. Тӥконь Главдя но кык ар бадӟым. Адями воксё пинал кылемын, нош мон весь секыт ужын. Весяк улытозям. Тӥни, мон кык ар тэльын ужай, ар мында — бригадаын. Со вискын... Кызьы-о луиз со? Парсьёсмес Чулие нуизы (Чули гурт вал на ай). Табере, парсьёсмес нуизы но, мон бригадаын ужаны кутски. Мызон интые фермае ӧй пыры. Парсьёсыз ар-а, мар-а отын возизы но, толыксы ӧйло, ӧз быгатэ. ӧз пия парсьсы. Пияз но — быриз, дыр, со. Одӥг парсьлы сизьымдон вить процент гинэ (парсьлы быдэ но ӧвӧл) парсьпи басьтӥзы. Бригадаын ужаны дыши кадь потыса улӥсько ни но, табере нош ик монэ тэльмыризы: сюд, пе, парсь — парсьпиед тынад улэ. Уг мынӥськы ни вал — кужмысь нуизы. Нош ик парсь сюдыны кутски. Озьы гинэ фермаын ӧй ужа. Весяк фермаын вал.

Четвёртойын дышетскыкум... Тани Лида доры мыном, шуиськом ук. Эше. Кык ар бадӟым маке эше вань мынам Ижын. Утчаса но сое ӧй шедьты мон. Адресной бюрое мынӥм но, адӟем потэ, утчалом шуыса... Ладьмер этеды вераз, Ижын улэ шуыса. Со Ладьмер этеосыд нырысь Восточной посёлокын улӥзы ук, Ижын. Барак кадь интыын улӥзы. Тӥни, отын улыкуз, со Лидаен пумиськем. Нош со Ладьмерлэн туганэз вал. Асьмелэн бакча берамы улӥз. Бакча берын бадӟым сирпу вань-а? Со сирпу дорын уло вал соос. Нюк палазгес. Соосын эшъяськисько вал мон но, тӥни, апаед “адресной бюрое мыныса шедьтом ай, мама” шуиз но, отчы мынӥм но — ӧм шедьтэ. Какможын улэмез гинэ, пе, вань. Какможын со аслаз родной братэныз улӥз, кышноен картэн. Воксё родной братэныз. Муртлы сётыны жаль, пе, шуыса...

Собере тӥни сое бригадире понӥзы но, со мыным шуиз: марым, пе, карод... Четвёртойын дышетскись мае ке, дышетскон вискытӥм ини, ма, гужем уд дышетскиськы ук, со монэ дорожное ужаны лэзиз. Ужаны лэзиз но шуиз: секыт, пе, уд ужа — адями гинэ кулэ мыным. Песок, пе, тырод гурезьысь. Отын, Мальканын, туж бадӟым гурезь но, гурезь улэ, пе, валэз пуктоно, гурезь йылысь песок тыроно. Секыт уз усьы, пе, — отчы мын ай. Нош сое бригадирлы шуыса лэзизы ини... Мар-о со дорожной-а? Тани та дамба ӝуткамын ук сюресэтӥ, сое ӝуткаллям но, со дамба вылэ тани та жужда пуклё кылемын вылэм. Со пукле вылтӥ сюй киськаса лэсьтӥллям. Со сисьмыса, лырк-лурк, лырк-лурк... Кудӥз сисьмемын, кудӥз кыче пу. Кудӥз ведь чаляк сисьме, нош кудӥз — уг. Табере тани та Даньыл мынэсьтым трослы бадӟым ук... Мынӥ ини отчы, сюй гинэ тыро шуыса, пичи маке. Нош мугор тон кадь кужмо, ӝужыт вал. Тани Ларис кыӵе зӧк, зӧк-кужмо, сыӵе ик вал. Дышетскон дыръям ик. Нош тятя кошкыкуз шуиз, пе: Такъянай, нылэз вазь дышетыны лэзь, мугорыз бадӟым, берло керпотоз. Адями бадӟымен дышетскиз, монэ пичиысь лэзизы дышетскыны. Куать арескын мынэмын мон, нош дышетско вал бадӟымесь. Азьвыл ведь трос уг учко вал, одно ик сыӵеен мын шуыса. Кыӵеен мынӥд сыӵеен. Табере, четвёртойын дышетскись маке, мынӥ дорожноез тупатыны. Сюй гинэ нуллод, шуизы. Нош монэ, мугор бадӟымен, кужмоен, лёгаськем сюй улысь шашкаез поттылтӥзы. Машинаен, тракторен ветлэмын ини отын, тап-тап лёгамын, сое соос берен поттылыны малпаллям. Со шашкаез ломен весь лумбыт поттылӥськом — сюрес урдсы лэзьяськом. Озьы километр, оло, кык-а, куинь-а километр сёто. Олокӧня сето вал. Мертаса ӵог тышкамын, сыӵе колхозлы — сомында, сыӵе колхозлы — сомында. Со Даньылэн весяк ми шашка поттылӥм, дорожнойын ужаса. Нош шуизы: сюй гинэ, пе, тырод, сюй гинэ. Мӧйыос сюй тырыны кариськизы, нош монэ, визьтэм мае ке, озьы шашка поттылтӥзы. Даньылэн ӵошен. Чуть пуксиськод, всё, дортӥ дорожнойёслэн бригадирзы ветлэ вал ини. Тӥни со Малькан сюрес — мынам копыръяме. Собере, со шашказэ поттылыса, урдэсызлэсь выллань мед луоз шуыса, сюй киськаськом, сое чошатӥськом вал. Али ведь машинаен ваё, кисьто, тракторен ӵошато. Нош ми ваньзэ — киын. Собере, дураз солэн ожо ке, со ожоез пичи но медаз кыльы, пуртэн сямен, лопаткаен вандылӥськом вал. Озьы дорожнойын ужам.

Тани та Педор Миша ведь... солы “Ветеран труда” медаль сётэмын. Асьсэлы пу ворттыны но... Педорезлы ямщик гинэ ветлэ вал со. Педорез юэ, пред шуыса. Со Педорзэ нуоз-ваёз вал... Мар карод бадӟым мугорен? Ужаны мугорыд бадӟым шуыса ужато, нош дӥськут басьтоно, дӥсяськоно ке, тросгес уксё кулэ... Ой, со шашка поттылэмме али ке но малпасько ке, сюлмы оломар луэ. Пичи но пуксьылытэк со ломен лумбыт ужаса, киос воксё пульдылыса, кырмыны но уг луы ни вал со ломез. Ко-ок! ко-ок! ломен кокаса, бералъяса поттылӥськом вал со шашкаез. Даньыл, мӧй маке, монэн эшъяськыса... ӵошеннамес поттылтӥзы.

Дышетскон дыръям тӥни озьы дорожнойын ужай. Дышетскемысь дугдӥ но — сразу ыж сюдыны пыри. Ар ыж сюдӥ. Табере тэле кошки, вербоваться кариськыса. Ар но ӝыны отын ужай. Бертӥ — конюхе кутски. Собере парсь сюдыны кутски. Толзэ дышетскисько, гужемзэ мамае интыын парсь сюдӥсько. Мама мызон ужа вал. Мамалэн эшез вал, пересь кышно. Со пересь кышно монэ сьӧраз нуллӥз, пастуханы. Яратско мон тонэ, нылы, бызьылӥськод, шуылӥз. Весь мама интыын парсь пастухасько вал гужемзэ. Кызьы ке валаны кутски — со дырысен. Собере, тӥни, ачим фермаын ужаны кутски. Пумозяз ини. Ужамысь дугдэм берам но (пенсие потэм берам), эшшо кык ар фермаын ужай на.

Со дорожнойын ужамелы укыр кӧты ӝож. Тани Педор Миша кышно но одӥг ар бадӟым мынэсьтым... Со сизьымез быдтӥз; нош мон — витез. Чиста калыкъёс сизьымез быдтӥзы, нош мынам — кин-о? — нокин мамалы юрттӥсь ӧй вал но, мон ӧй быгаты дышетскыны. Мама огназ. Солы юрттыны турттӥ. Эшшо тӥледыз но ук со фермаын курадӟытӥ на. Верка вера: Сергей, пе, монэ наказать каре вал. Как уг быгатӥськы — носилкаен донгыса куштэ, шуэ, Верка, пе, Васикез озьы карисько вал, уг быгаты но. Васик Ларисэз, пе, кариз. Однако тӥ но чидады ини! Со фермаын дояркаын ужакум.

Парсь сюдыны яратско вал. Весь но сюдысал вал но, Вишуре нуизы парсьёсыз. Вань мылкыд парсьлы мимам али ке но. Туэ сизьым парсь кельтӥзы но, Верка гужемзэ монэ ӧз лэзь ни пырыны. Верка сюдыны кутскиз но, умой-умой сюдымтэеныз, парсьёсыз чиста пыдтэм-куктэм луизы. Огзэ пияны кельто, шуисько, парсьме но, уг тодӥськы, пиятыны пӧрмыто-а, уг-а.

Парсь сюдон дыръям Иже нырысьсэ лыктӥ мон. Табере, парсьпи сётканы кутскизы но, мыным дополнительной укмыс парсьпи сётӥзы. Колхозъёс сётӥзы, басьтӥсь ӧвӧл,— ма, мар-о каром на? Укмыс манетэн вузай со парсьпиме. Уксётэк ведь ужано вал азьвыл — трудоденен. Нош уксё, ачид кытысь ке шедьтӥськод ке, озьы гинэ вал. Табере со парсьпиме укмыс манетэн вузай но соин пальто басьтыны мынӥ ини. Итчи Такъянаен Гурьянэн сьоры, Иже. Мар-о, уксё ӧвӧл, укмыс манетэн укмыс парсьпиед — кӧня-о гинэ луиз со?.. ну вот. Собере кӧня ке вал, лэся, асьмелэн уксёмы. Соин лыктӥ, вуж пальто басьтӥ комиссионнойысь. Сю манетэн. Я, кельше та, кельше, шуо ини со Гурьянъёс. Со пальтолэн воротникез! Маке кузя тани та-азьы ошкемын вал! Кельше, кельше, пе,— косӥзы ини со вуж пальтоез басьтыны. Басьтӥ. Табере нуллэме но ӧз пот ни мынам сое. Озьы Иже ветлӥ.

Табереяз соос мынэсьтым вина басьтэмме возьмало вылэм, соос монэ нуллӥзы шуыса. Нош мон ӧй басьты. Ачим уг юиськы вал грамм но. Табере бертӥзы но — жидомор, пе, шуо, одӥг грамм но вина ӧз басьты ук нуллэм поннамы. Ма, уксёед ӧвӧл бере, маин-о мон вина басьтом? Ачим уг юиськы дыръя — ӧй басьты. Тӥни, соослэн йырзы кур луэм. Озьы монэ нуллӥзы.

Со Гурьянлэн родняез Шмаков вылэм, писатель Шмаков. Пырим отчы кӧлыны. Отын кӧлӥм. Табере, кӧлӥськом ини отын, со Шмаковъёс дорын но, со, писатель бере, уин султэ — нош мынам изёнэ сак ук — уин султэ но корк-корк-корк гожъяськыны кутске. Вӧтамзэ но, пе, со гожъя озьы. “Ма, мар-о со уйбыт озьы корккетӥз?” — шуисько мон. Со, пе, писатель но — вӧтамзэ но озьы гожъя. Уин, пе, малпаське но, как шӧдэ — сразу гожъя. Собере сое ваньзэ гожъя-гожъя, пе, но, огазе карыса, книга, пе, лэсьтэ. Табере со шуэ ини монэ: нош эшты кин маке? Гурьян шуэ: ма, пе, со озьы-озьы парсь сюдэ но — парсь сюдон дорын, пе, передовой. Парсьлы быдэ дас кык парсьпие вал мынам соку, нош луэ вал кык-куинь гинэ. Дас кык парсьпие шуыса, мыным парсьпи сётӥзы, фотографировать каризы. Олокытчы понӥзы со фотокарточкаме, кин ке лушкаса нуиз-а, мар-а. Симапай дорын вал на но... Гурьян вераз но, книга потто, шуиз вал но, ӧй адӟы ни, ӧй ву ни мон.

Соослэн одӥг гинэ пизы вылэм. Асьсэлэн ӧвӧл со— утем маке. Шмаковлэн братэзлэсь пизэ утиллям. Со пизылы шуыса, соос Сюреке корка басьтӥллям но, со братэз кутэм но, корказэ вузам но, уксёзэ капыртэм. Шмаков коркатэк кылем. Пиезлы шуыса, юри басьтэм вылэм, пенсие потӥ ке, отчы, Сюреке, улыны мыно шуыса. И озьы коркатэк кылиз.

 Со пизэс соос кызьы сюдыны ик уг валало вал. Мар-о сыӵе ӵуж, виско-виско мар ке луэ, ческыт маке? Лимон-а, апельсин-а, кызьы-о? Сиыны луись мар ке. Со пизэс жаляса, милемлы котькудмылы, мед веръялоды шуыса, одӥг пилетэн сёткаса сюдӥз со Шмаков. Ма, гожъяд ке, ваньзэ тодыса гожъяны кулэ ук, пие. Тани тятяез но армие служить карыны басьтӥзы но, тятялы командиръёссы... похвальной гожтэт лэзё-а? Озьы похвальной гожтэт лэзиллям. Со гожтэтсэ но ыштӥм ини. Татын картэд кыӵе передовой мынэ — тятя танкист вал, трактористлы дышетскемын вал — тон но озьы ик колхоз ужын мын, шуо вал мамаез но, нош со ноку но бер ӧз кыльы — весяк передовой ветлэ вал котькыӵе ужын но. Аран дорын но, етӥн сэстонын но... Бабаедлэн киыз таӵе вал, тодскод на-а?.. Етӥн сэстон машинае сюрыса, сыӵе киё луыса, воксё тэйӟектӥз, пе, со киыз.

Весь секыт уж ужамен но таӵе... Мугорыд секытэн, секыт пыдъёсыдлы, шуо но, одӥг мон гинэ секыт но ӧвӧл но. Весь пыдкук но уг сюры вал — кутэн ветлӥськиз. Кут но басьтыны ӧз сюрылы. Берат, ачим кутаны кутскыса, ойдо ачим но вузай ини кут...


Список психических и душевных болезней Medsest.ru/disease/mental

Подпишись!
Будь в курсе новостей сайта «Удмуртология»
и других удмуртских интернет-проектов


Рассылки Subscribe.Ru Рассылки Yahoo!
Новости удмуртского
национального интернета



Новости удмуртского
национального интернета



URL данной страницы:
http://www.udmurt.info/library/udmurt/mamalen.htm


наш баннер
Udmurtology
каталоги
Rambler's Top100
Находится в каталоге Апорт
AllBest.Ru






WebList.Ru
 
Denis Sacharnych 2002-2009. Положение об использовании материалов сайта